ބ. އޭދަފުށީ ޒުވާނުންގެ ކްލަބުން އިންތިޒާމުކޮށްގެން 14 އަހަރުންދަށުގެ ކުޑަކުދިންނަށް އޭދަފުށީގައި ބޭއްވި ފުޓްބޯޅަ މުބާރާތުގެ ޗެމްޕިއަންކަން އެފްސީ ރެޑް ބްލް ހޯދައިފި އެވެ.

ހޮނިހިރު ދުވަހު ހަވީރު ކުޅުނު ފައިނަލް މެޗުގައި އެފްސީ ބުރު ޓީމާ ދެކޮޅަށް ނުކުމެ ރެޑް ބްލް މޮޅުވެފައިވަނީ 1-0 ން ނެވެ.

5 ޓީމް ވާދަކޮށް މިމަހު 2 ން 23 ގެ ނިޔަލަށް "ސީސީ ކަޕް 2010" ގެ ނަމުގައި ކުރިއަށް ގެންދިޔަ މި މުބާރާތުގެ އެންމެމޮޅު އަދި އެންމެގިނަ ގޯލުޖެހި ކުޅުންތެރިޔަކަށް ހޮވިފައިވަނީ އެފްސީ ރެޑް ބްލުގެ އަބްދުﷲ މުއުތައްޒު އެވެ. އެންމެ މޮޅު ފޯވާޑް ކުޅުންތެރިޔަކަށް ހޮވިފައިވަނީ އެފްސީ ރެޑް ބުލްގެ އިބްރާހިމް ޝަރީފެވެ. އަދި އެންމެ ޑިފެންސް ކުޅުންތެރިޔަކަށް އެފްސީ ބުރުގެ އަހުމަދު ޝިއާން ހޮވިފައިވާއިރު އެންމެ މޮޅު މިޑްފީލްޑް ކުޅުންތެރިއަކީ އެފްސީ ރެޑް ބުލްގެ މުހައްމަދު ޔަމާނެވެ. މި މުބާރާތުގެ އެންމެމޮޅު ގޯލް ކީޕަރަކީ ރެޑްބުލްގެ ސާއިދު އަބޫބަކުރެވެ.

މި މުބާރާތަކީ އޭދަފުށީ ފުޓްބޯޅައިގެ ރޫހު އާލާކޮށް ކުޑަކުދިންނަށް ފުޓްބޯޅައިގެ ހުނަރު، ދައްކާލުމުގެ ފުރުސަތު ހޯދައިދިނުމުގެ ގޮތުން ބޭއްވި މުބާރާތެއް ކަމަށް މި މުބާރާތް ކުރިއަށް ގެންދިއުމުގައި އިސްކޮށް ހަރަކާތްތެރިވި ރާއްޖޭގެ ކުރީގެ މަޝްހޫރު ފުޓްބޯޅަ ކުޅުންތެރިޔާ މުހައްމަދު ޒާހިދު (ބައްޓޭ) ބުންޏެވެ. އަދި މި މުބާރާތުގައި ރަނގަޅު ފެންވަރުގެ ކުދިން ތިބިކަން ފާހަގަކޮށް އޭނާ ބުނީ އެ ކުދިންނަށް ރަނގަޅު ތަމްރީނެއް ދީގެން ގައުމު ތަމްސީލު ކުރާވަރުގެ ކުޅުންތެރިން ނެރެވިދާނެ ކަމަށެވެ.

މި މުބާރާތުގެ އެކިއެކި ވަނަތަކަށް ހޮވުނު ކުޅުންތެރިންނަށް ޓްރޮފީއާއި އިނާމާއި ހަނދާނީލިޔުން ހަވާލުކޮށްދެއްވީ ސީސީ ސްޕޯޓްސްގެ އިސް ބައެއް މެންބަރުންނެވެ