މިދުވަސްވަރު އާދަޔާ ޚިލާފަށް ވައްކަން ކުރުން އޭދަފުށީގައި އިތުރުވެފައިވާ ކަމަށް ވެއެވެ. އެކިވައްތަރުގެ އަގުބޮޑު މުދާތައް ދުވާލާ ރޭގަނޑު ވަގަށްނެގުން އިތުރުވަމުންދާއިރު މިކަމާމެދު އާއްމުންވެސް ވަރަށް ބޮޑަށް ހޭލުންތެރިވާން ޖެހެއެވެ.
ވަގުން ވަންނަނީ ހަމައެކަނި އާއްމުން ދިރިއުޅޭ ގޭގެ އަށް އެކަންޏެއް ނޫނެވެ. ފަސޭހައިން އެއްޗެއް ވަގަށް ނެގޭނެ ކޮންމެ ތަނެއްވަނީ ވަގުންގެ އަމާޒަކަށް ވެފައެވެ. އެހެންކަމުން، ވަގުންނަށް ވައްކަން ކުރުމުގެ ފުރުސަތު ނުދިނުމަށްޓަކައި އެންމެންވެސް ފިޔަވަޅުތައް އަޅަންޖެހެއެވެ.
ފަސޭހައިން ގެއަށް ނުވަތަ އިމާރާތަށް ވަދެވޭގޮތަށް ދޮރުތައް ހުރިނަމަ، ރަނގަޅަށް ތަޅުލެވޭގޮތަށް ނުވަތަ ތަންޑު އެޅޭގޮތަށް ހެދުމަކީ މުހިއްމު ކަމެކެވެ. މީހަކު ގޭގައި ނޫޅޭނަމަ، ރަނގަޅަށް ތަޅުލުމަށްފަހު، އަވައްޓެރިން ކައިރީ، ގެއަށް ކޮންމެވެސް ވަރަކަށް ބެލުމަށް އެދޭށެވެ. އަދި ޝައްކު ކުރެވޭފަދަ ގޮތަކަށް މީހަކު އުޅޭތަން ފެނިއްޖެނަމަ، ފުލުހުންނަށް އަދި ގޭގެ ނުވަތަ އިމާރާތުގެ ވެރިފަރާތަށް އެންގުމަކީވެސް، ވަގުންގެ ނުރައްކާ ކުޑަކުރުމަށް ކުރެވިދާނެ ކަމެކެވެ.
|
