ޕާކިސްތާނަށް އެހީވުމަށްޓަކައި ބ. ތުޅާދޫގެ ރައްޔިތުންގެ ނަމުގައި ސައުވީސް ހާހަށްވުރެ ގިނަރުފިޔާ ޕާކިސްތާން ރިލީފް ފަންޑަށް ހަދިޔާކޮށްފިކަމަށް އެރަށު އޮފީހުން ބުނެފިއެވެ.

ތުޅާދޫ އޮފީހުން ބުނީ އެރަށު ރައްޔިތުންގެ ނަމުގައި ޕާކިސްތާނަށް އެހީވުމަށް ހުޅުވި ފަންޑް ފޮށިތަކަށް ލިބުނު ސައުވީސްހާސް ފައްސަތޭކަ ފަންސާސް އަށްރުފިޔާ ފަންސާސް ފަސްލާރި ޕީކޭ ރިލީފް ފަންޑް އެކައުންޓަށް ޖަމާކުރީ އިއްޔެ ކަމަށެވެ.

ޕާކިސްތާނު ރައްޔިތުންނަށް އެހީވުމަށް ފައިސާ އެއްކުރުމަށް ތުޅާދޫ ޖަމްއިއްޔާތަކާ، ސިޔާސީ ޕާޓީތަކުގެ ގޮފިތައް އަދި ރަށުއޮފީސް ގުޅިގެން މީގެ ދެހަފްތާކުރިން އެރަށުގެ ތިން މިސްކިތެއްގައި ބެހެއްޓި މިފަންޑް ފޮށިތަކަށް ތުޅާދޫގެ އާންމުންގެ ފަރާތުން ވަރަށް ބޮޑު ތަރހީބެއް ލިބުނުކަމަށްވެސް އެރަށު އޮފީހުން ބުނޭ.

ޕާކިސްތާނުގައި ހާލުގައި ޖެހިފައިތިބި ރައްޔިތުންނަށް އެހީވުމުގެ ގޮތުން ބ. އަތޮޅު ކެންދުއާ، ދޮންފަނު އަދި ހިތާދުއާ، ފުޅަދޫ ރައްޔިތުން ގުޅިގެން މިހާތަނަށް ޖުމްލަ ހަތްދިހަފަސްހާހަށްވުރެ ގިނަރުފިޔާ ހަދިޔާކޮށްފައިވާކަމަށްވެސް އެރަށްރަށުގެ އޮފީސްތަކުން ބުނޭ.