ރާމުﷲ: އިސްރާއީލާއިއެކު ސީދާ ވާހަކަތަކަކަށް ނުގޮސްފިނަމަ އެމެރިކާއާއި ފަލަސްތީނާއިދެމެދު އޮތް ގުޅުން ކަނޑާލައްވާނެކަމުގެ އިންޒާރު އެމެރިކާގެ ރައީސް ބަރަކް އޮބާމާ ފަލަސްތީނުގެ ރައީސް މަހްމޫދު އައްބާސް އަށް ދެއްވައިފިކަމުގައި ފަލަސްތީނުގެ އޮފިޝަލުން ވިދާޅުވެއްޖެއެވެ.

އެބޭފުޅުން ވިދާޅުވީ، މިހާތަނަށް އެމެރިކާއިން ފަލަސްތީނަށް ދީފައިވާ އެމެރިކާގެ އެންމެ ހަރުކަށި އިންޒާރު ދީފައިވަނީ އޮބާމާ އައްބާސްއަށް ފޮނުއްވި ސިޓީފުޅެއްގައެވެ. އޮފިޝަލު ވިދާޅުވީ މި ސިޓީފުޅެއް އޮބާމާ އައްބާސްއަށް ފޮނުއްވާފައިވަނީ ޖުލައި 16 ގައެވެ.

މިހާތަނަށް އިސްރާއީލާއި ވާހަކަދެއްކުމަށް ފަލަސްތީނުން ކުރި ކޮންމެ މަސައްކަތެއް އިސްރާއީލުންވަނީ ފެނަށް ދުއްވާލާފައެވެ. އެހެންކަމުން މަހްމޫދު އައްބާސް މިހާރު ވިދާޅުވެފައިވަނީ، މިނިވަން ފަލަސްތީނަކަށް އިސްރާއީލުން އެއްބަސްވުމުގެކުރިން މަޝްވަރާ ނުކުރައްވާނެ ކަމަށެވެ. އެގޮތުން އައްބާސް ވިދާޅުވެފައިވަނީ، ހުޅަނގު އައްސޭރިއާއި ޣައްޒާ އަދި އިރުމަތީ ގުދުސަކީ ފަލަސްތީނުގެ ދައުލަތުގެ ތެރޭގައިވާ ތަންތަންކަމުގައި އިސްރާއީލުން ގަބޫލުނުކުރާހާހިނދަކު ސީދާ ވާހަކަތަކަށް ވަޑައިނުގަންނަވާނެ ކަމަށެވެ.